મધ્યપ્રદેશ, છત્તીસગઢ અને રાજસ્થાન વિધાનસભા ચૂંટણીની અત્યારથી BJPએ રણનીતિ તૈયાર કરી
નવી દિલ્હીઃ ઉત્તર પ્રદેશ, ઉત્તરાખંડ, ગોવા અને મણિપુર વિધાનસભાની ચૂંટણીમાં જંગી જીત બાદ ભાજપે આ વર્ષના અંતમાં અને 2023માં યોજાનારી વિધાનસભા ચૂંટણી માટે તૈયારીઓ શરૂ કરી દીધી છે. વર્ષ 2023માં મધ્યપ્રદેશ, છત્તીસગઢ અને રાજસ્થાનમાં યોજાનારી ચૂંટણીમાં પીએમ નરેન્દ્ર મોદી ભાજપનો ચહેરો હશે. આ રાજ્યોમાં મુખ્યમંત્રી પદના ઉમેદવારોના નામ પહેલા જાહેર નહીં કરવામાં આવે. પરિણામ આવ્યા બાદ જ નિર્ણય લેવામાં આવશે. તેમજ યુવા નેતાઓને મહત્વની જવાબદારી સોંપવાનું ભાજપ વિચારી રહી છે.
સૂત્રોના જણાવ્યા અનુસાર ભાજપ મધ્યપ્રદેશમાં શિવરાજ સિંહ ચૌહાણ, છત્તીસગઢમાં રમણ સિંહ અને રાજસ્થાનમાં વસુંધરા રાજેના નામ પર ચૂંટણી નહીં લડે. આ રાજ્યોમાં નવી પેઢીને આગળ લાવવા માટે કામ કરવામાં આવી રહ્યું છે. ચૂંટણી બાદ સીએમનો ચહેરો સામે આવશે. ભાજપે ગુજરાત, હિમાચલ અને 2023માં યોજાનારી ચૂંટણી માટે સંપૂર્ણ રણનીતિ તૈયાર કરી લીધી છે.
મધ્યપ્રદેશમાં શિવરાજ સિંહ ચૌહાણ સતત ત્રણ વખત મુખ્યમંત્રી રહ્યા હતા. ડિસેમ્બર 2018ની વિધાનસભા ચૂંટણીમાં ચૌહાણ ભાજપને સત્તાના દરવાજા સુધી લઈ જઈ શક્યા ન હતા. ભાજપ કોંગ્રેસથી થોડીક સીટો પાછળ રહી ગયું હતું, જેના કારણે મધ્યપ્રદેશમાં 17 ડિસેમ્બર 2018ના રોજ કમલનાથના નેતૃત્વમાં કોંગ્રેસની સરકાર બની હતી. જો કે, કમલનાથ સરકાર પડતા કોંગ્રેસના નારાજ ધારાસભ્યોની મદદથી ભાજપે સત્તા મેળવી હતી.
રમણ સિંહ 2004 થી નવેમ્બર 2018 સુધી સતત ત્રણ વખત છત્તીસગઢના મુખ્યમંત્રી રહ્યા હતા. ડિસેમ્બર 2018ની વિધાનસભા ચૂંટણીમાં ભાજપને હારનો સામનો કરવો પડ્યો હતો. આવી સ્થિતિમાં ભાજપ હવે છત્તીસગઢમાં એક નવો ચહેરો લાવવા માંગે છે, જે પાર્ટી માટે લાંબી ઇનિંગ રમી શકે. આ સાથે એ પણ નિશ્ચિત છે કે ભાજપ 2023 પહેલા કોઈ નવો ચહેરો નહીં લાવે. આવી સ્થિતિમાં મોદીના નેતૃત્વમાં જ વિધાનસભાની ચૂંટણી યોજાશે. ચૂંટણીના પરિણામો આવ્યા બાદ જ નવો ચહેરો સામે આવશે.
ડિસેમ્બર 2013માં પ્રચંડ બહુમતી સાથે રાજસ્થાનમાં સરકાર બનાવનાર ભાજપને ડિસેમ્બર 2018ની વિધાનસભા ચૂંટણીમાં વસુંધરા રાજેના નેતૃત્વમાં હારનો સામનો કરવો પડ્યો હતો. છ મહિના પછી યોજાયેલી લોકસભાની ચૂંટણીમાં ભાજપને મોદીના નામે જંગી જીત મળી હતી. રાજ્યમાં ભાજપે 25 બેઠકો કબજે કરી હતી.
કોંગ્રેસને કારમી હારનો સામનો કરવો પડ્યો હતો. હિમાચલ ભલે બીજેપી માટે નાનું રાજ્ય હોય, પરંતુ રાજ્ય ભાજપ માટે ખૂબ જ મહત્વપૂર્ણ છે. ગયા વર્ષે નવેમ્બરમાં યોજાયેલી પેટાચૂંટણીમાં ભાજપને મંડી લોકસભા અને અરકી, જુબ્બલ કોટખાઈ અને ફતેહપુર વિધાનસભા બેઠકો પરથી મોટી હારનો સામનો કરવો પડ્યો હતો. આ પછી સીએમ જયરામ ઠાકુરના નેતૃત્વને લઈને બીજેપી ગંભીર થઈ ગઈ છે.
