અમદાવાદઃ મ્યુનિ.કોર્પોરેશન દ્વારા શહેરની સાબરમતી નદી પર આવેલા બ્રિજનું વારાફરતી સમારકામ કરવામાં આવી રહ્યું છે. સુભાષ બ્રિજ, ઈનકમટેક્સ ગાંધી બ્રિજ અને નહેરુ બ્રિજના રિપેરિંગની કામગીરી બાદ 81 વર્ષ જૂના સરદાર બ્રિજનું (જમાલપુર બ્રિજ) રિપેરિંગ કામ થશે. 15મી નવેમ્બર, સોમવારથી કામગીરી શરૂ થશે જે બે મહિના સુધી એટલે કે જાન્યુઆરી 2020માં પૂર્ણ થશે. આ દરમિયાન બ્રિજ સંપૂર્ણપણે બંધ નહીં રહે. બ્રિજનો એક તરફનો ભાગ બંધ રહેશે જ્યારે એક ભાગમાં બંને તરફનો વાહનવ્યવહાર થશે.
અમદાવાદ મ્યુનિ.કોરેપોરેશનના સૂત્રોએ જણાવ્યું હતું કે, શહેરના સરદાર બ્રિજમાં જોઈન્ટ એક્સપાન્સન બદલવાની કામગીરી સોમવારથી શરૂ કરાશે. જેનો ખર્ચ આશરે 80 લાખ રૂપિયા થશે. સાબરમતી નદી પરના તમામ બ્રિજના સમારકામની કામગીરી છેલ્લા એક વર્ષથી ચાલી રહી છે. જેમાં જમાલપુરના સરદાર બ્રિજના રિપેરિંગની કામગીરી વખતે બ્રિજના બે ભાગનું વારાફરતી રિપેરિંગ કરાશે. જેમાં પહેલા જમાલપુર સ્માશન ગૃહથી એનઆઈડી તરફથી બ્રિજ પર એક્સપાન્સ જોઈન્ટ બદલવાના હોવાથી બીજી બાજુના ભાગે બંને બાજુનો ટ્રાફિક ચાલુ રાખવામાં આવશે. ત્યારબાદ બીજા તબક્કામાં ટાઉનહોલથી જમાલપુર તરફના બાકી રહેતા બ્રિજનું રિપેરિંગ કરવામાં આવશે. ત્યારે સામેની સાઈડ પર બંને બાજુનો ટ્રાફિક ચાલુ રાખવામાં આવશે.
શહેરના સરદાર બ્રિજની કામગીરીને લઈને વાહનચાલકોએ ભારે હાલાકીનો સામનો કરવો પડી શકે છે. જમાલપુરના સરદાર બ્રિજ પર સવારના સમયે પણ ખૂબ ટ્રાફિક હોય છે ત્યારે એક જ બાજુના બ્રિજ પર બંને તરફનો વાહન વ્યવહાર ચાલુ રાખવામાં આવશે તો ટ્રાફિકની સમસ્યા સર્જાશે. તેથી, આ બ્રિજનો ટ્રાફિક નજીકમાં આવેલા અન્ય બ્રિજ તરફ વળશે. ભૂતકાળમાં પણ અન્ય બ્રિજની કામગીરી વખતે ટ્રાફિકની સમસ્યા સર્જાઈ હતી.
શહેરના ઈન્કમટેક્સ ગાંધીબ્રિજ અને નહેરુ બ્રિજના સમારકામ વખતે બ્રિજ પર વાહનોની લાંબી કતાર જોવા મળી હતી. એક કિમી જેટલ લાંબી લાઈન થતાં વાહનચાલકો પરેશાન થઈ ગયા હતા. સરદાર બ્રિજ પરથી તો વળી એસટી બસ પણ વધારે પસાર થાય છે તેથી તે બ્રિજનો ઉપયોગ કરવાનું ટાળી વાહનચાલકો એલિસબ્રિજથી જમાલપુર એસટી બસ સ્ટેન્ડ તરફ જઈ શકે છે.