લોકસભા ચૂંટણીના પરિણામ જાહેર થયા બાદ પ્રધાનમંત્રી નરેન્દ્ર મોદી ભાજપ કાર્યાલય પહોંચ્યા. જ્યાં પાર્ટીના નેતાઓ અને કાર્યકર્તાઓને સંબોધન કર્યું. સંબોધનની શરૂઆત ‘ભારત માતા કી જય’ અને ‘જય જગન્નાથ’થી કરી. PM મોદીએ કાર્યકર્તાઓને સંબોધિત કરતા વિજય માટે દેશવાસીઓનો આભાર માન્યો. તેમણે કહ્યું કે, ત્રીજી ટર્મમાં દેશ મોટા નિર્ણયોનો નવો અધ્યાય લખશે.
પ્રધાનમંત્રી મોદીએ કહ્યું કે, આજનો દિવસ ખૂબ જ શુભ દિવસ છે. આ શુભ દિવસે, NDA સતત ત્રીજી વખત સરકાર બનાવશે. અમે સૌ જનતા જનાર્દનના ખૂબ ખૂબ આભારી છીએ. દેશવાસીઓએ NDA અને ભાજપ પર પૂર્ણ વિશ્વાસ વ્યક્ત કર્યો છે. આજની જીત વિશ્વની સૌથી મોટી લોકશાહીની જીત છે. ભારતના બંધારણ પ્રત્યેની અતૂટ વફાદારીની આ જીત છે. આ વિકસિત ભારતના વચનની જીત છે. આ સબકા સાથ સબકા વિકાસના મંત્રની જીત છે. આ 140 કરોડ દેશવાસીઓની જીત છે.
મોદીએ કહ્યું કે, આ આદેશના ઘણા પાસાઓ છે. 1962 પછી આ પ્રથમ વખત છે જ્યારે કોઈ સરકાર તેના બે કાર્યકાળ પૂર્ણ કર્યા પછી સતત ત્રીજી વખત સત્તામાં પરત આવી હોય. ઓડિશા, અરુણાચલ પ્રદેશ અને આંધ્ર પ્રદેશમાં ભાજપના શાનદાર પ્રદર્શનનો ઉલ્લેખ કરતાં તેમણે કહ્યું કે, અરુણાચલ પ્રદેશ, આંધ્ર પ્રદેશ, ઓડિશા અને સિક્કિમમાં કૉંગ્રેસનો સફાયો થઈ ગયો છે. ઓડિશામાં ભાજપ સરકાર બનાવવા જઈ રહી છે. કેરળમાં પણ ભાજપે એક બેઠક જીતી છે, અમારી પાર્ટીના કાર્યકર્તાઓએ કેરળમાં ઘણું બલિદાન આપ્યું છે.
વિપક્ષી I.N.D.I.A ગઠબંધન પર કટાક્ષ કરતા મોદીએ કહ્યું કે જો અમારા વિરોધીઓ એક થાય તો પણ તેઓ એટલી બેઠકો જીતી ન શકે જેટલી આ લોકસભા ચૂંટણીમાં ભાજપ એકલા હાથે જીતી છે. પ્રધાનમંત્રીએ ચૂંટણી અસરકારક રીતે હાથ ધરવા બદલ ચૂંટણી પંચનો આભાર માન્યો હતો. તેમણે કહ્યું કે, આટલા મોટાપાયે ચૂંટણી પ્રક્રિયા હાથ ધરવા બદલ હું ભારતના ચૂંટણી પંચનો પણ આભાર માનું છું. દરેક ભારતીયને ભારતની ચૂંટણી પ્રક્રિયા અને સિસ્ટમની વિશ્વસનીયતા પર ગર્વ છે.
મોદીએ કહ્યું કે, જમ્મુ-કાશ્મીરના મતદારોએ આ ચૂંટણીમાં રેકોર્ડ મતદાન કરીને અભૂતપૂર્વ ઉત્સાહ દર્શાવ્યો છે અને વિશ્વભરમાં ભારતને બદનામ કરતી શક્તિઓને અરીસો બતાવ્યો છે. તેમના ભાષણ દરમિયાન, પ્રધાનમંત્રીએ તેમની સ્વર્ગસ્થ માતાને યાદ કરી અને કહ્યું કે, મારી માતાના મૃત્યુ પછી આ મારી પ્રથમ ચૂંટણી છે.