વાણિજ્ય અને ઉદ્યોગ મંત્રાલયે જાહેર કરાયેલા આંકડા અનુસાર, જુલાઈ મહિનામાં દેશની માલસામાનની નિકાસ વાર્ષિક ધોરણે 1.2 ટકા ઘટીને 33.98 અબજ ડોલર થઈ છે. ગયા વર્ષે નિકાસ $34.39 બિલિયન હતી.
જો આપણે આયાતની વાત કરીએ તો તે જુલાઈમાં લગભગ 7.45 ટકા વધીને 57.48 અબજ ડોલર થઈ હતી, જે ગયા વર્ષે 53.49 અબજ ડોલર હતી. ડેટા અનુસાર, આ સમયગાળા દરમિયાન દેશની કુલ નિકાસ અને કુલ આયાત વચ્ચેનો તફાવત 23.5 અબજ ડોલર રહી છે.
મંત્રાલયે જણાવ્યું કે, જુલાઈ 2024માં દેશની કુલ નિકાસ $ 62.42 બિલિયન થવાનો અંદાજ છે, જે જુલાઈ 2023ની તુલનામાં 2.81 ટકાની સકારાત્મક વૃદ્ધિ દર્શાવે છે. જુલાઈ 2024માં કુલ આયાત 72.03 બિલિયન યુએસ ડોલર હોવાનો અંદાજ છે, જે જુલાઈ 2023ની સરખામણીમાં 7.14 ટકાની સકારાત્મક વૃદ્ધિ દર્શાવે છે.
વાણિજ્ય સચિવ સુનીલ બર્થવાલે આંકડા જાહેર કર્યા બાદ પ્રેસને સંબોધતા કહ્યું કે વર્તમાન પ્રવાહોને જોતા દેશની કુલ માલ અને સેવાઓની નિકાસ ગયા વર્ષના આંકડાને વટાવી જશે. ચાલુ નાણાકીય વર્ષ 2024-25ના પ્રથમ 4 મહિના (એપ્રિલ-જુલાઈ) દરમિયાન નિકાસ 4.15 ટકા વધીને 144.12 અબજ ડોલર થઈ છે, જ્યારે આયાત 7.57 ટકા વધીને 229.7 અબજ ડોલર થઈ છે.
નોંધનીય છે કે દેશની મર્ચેન્ડાઇઝ નિકાસ જૂનમાં 2.56 ટકા વધીને 35.2 અબજ ડોલરે પહોંચી હતી. જોકે, આ સમયગાળા દરમિયાન વેપાર ખાધ વધીને $20.98 બિલિયન થઈ ગઈ હતી.
#IndianExports#TradeDeficit#CommerceMinistry#TradeStatistics#MerchandiseTrade#IndiaEconomy#ExportGrowth#ImportData#EconomicTrends#SunilBarthwal