મુંબઈઃ ભારતીય શેરબજારના બેન્ચમાર્ક સૂચકાંકો શુક્રવારે લાલ નિશાન સાથે બંધ રહ્યા હતા. સેન્સેક્સ 55.47 પોઈન્ટ એટલે કે 0.07 ટકાના ઘટાડા સાથે 79,486.32 પર બંધ થયો હતો, જ્યારે નિફ્ટી 51.15 પોઈન્ટ એટલે કે 0.21 ટકાના ઘટાડા સાથે 24,148.20 પર બંધ થયો હતો.
NSEના ડેટા અનુસાર, PSU બેન્ક, મીડિયા, રિયલ્ટી અને ઓઇલ એન્ડ ગેસ સેક્ટરલ ઇન્ડેક્સમાં સૌથી વધુ ઘટતા શેરો હતા. બજારમાં વિદેશી પોર્ટફોલિયો રોકાણકારો (FPIs) દ્વારા સતત વેચાણ ચિંતાનો વિષય છે. ઓક્ટોબરમાં, FPIsએ રૂ. 94,017 કરોડના શેરનું વેચાણ કર્યું હતું, જેનાથી બજારમાં દબાણ વધ્યું હતું અને તેઓ ચાર મહિના સુધી સતત ખરીદદારો રહ્યા પછી ભારતમાં ચોખ્ખા વેચાણકર્તા બન્યા હતા.
સેન્સેક્સના 30 શેરોમાં એશિયન પેઈન્ટ્સ, ટાટા સ્ટીલ, સ્ટેટ બેન્ક ઓફ ઈન્ડિયા, રિલાયન્સ ઈન્ડસ્ટ્રીઝ, એનટીપીસી, ટાટા મોટર્સ, આઈસીઆઈસીઆઈ બેન્ક અને ઈન્ડસઈન્ડ બેન્ક સૌથી વધુ ઘટ્યા હતા. વધનારાઓમાં મહિન્દ્રા એન્ડ મહિન્દ્રા, ટાઇટન, ટેક મહિન્દ્રા, ઇન્ફોસિસ, નેસ્લે અને હિન્દુસ્તાન યુનિલિવરનો સમાવેશ થાય છે. એક્સચેન્જ ડેટા અનુસાર, વિદેશી સંસ્થાકીય રોકાણકારો (FII) એ ગુરુવારે રૂ. 4,888.77 કરોડની ઇક્વિટી વેચી હતી.
એશિયન બજારોમાં સિયોલ, શાંઘાઈ અને હોંગકોંગમાં ઘટાડો જોવા મળ્યો હતો જ્યારે ટોક્યોમાં સકારાત્મક વલણ જોવા મળ્યું હતું. યુરોપિયન બજારોમાં ઘટાડો નોંધાયો હતો.
