મુંબઈઃ વિવેક અગ્નિહોત્રીની ફિલ્મ ધ કાશ્મીર ફાઈલ્સને લઈને બોલિવૂડ સ્ટાર્સનું મૌન દરેકને ખુંચી રહ્યું છે. ખાન સુપરસ્ટારથી લઈને ઘણા મોટા સ્ટાર્સ આ કારણે ખૂબ ટ્રોલ પણ થયા છે. દરમિયાન આમિર ખાને તેના 57માં જન્મદિવસ પર ધ કાશ્મીર ફાઇલ્સની ટીમને શુભેચ્છા પાઠવી હતી અને એમ પણ કહ્યું હતું કે તે ટૂંક સમયમાં જ જોશે.
દિલ્હીમાં ફિલ્મ ટ્રિપલ આરના પ્રમોશન દરમિયાન આમિર ખાનને ધ કાશ્મીર ફાઇલ્સ વિશે પ્રશ્ન કરવામાં આવ્યો, ત્યારે તેણે પોતાનો પક્ષ રજૂ કરવાનો પ્રયાસ કર્યો હતો. આમિર ખાને કહ્યું છે કે, દરેક ભારતીયે આ ફિલ્મ જોવી જ જોઈએ. RRRની પ્રેસ કોન્ફરન્સ દરમિયાન આમિર ખાને કહ્યું કે તેણે કાશ્મીર ફાઇલ્સ જોઈ નથી, પરંતુ ટૂંક સમયમાં તેને જોવાનો પ્રયત્ન કરીશ. ‘આ આપણા ઈતિહાસ સાથે જોડાયેલો એવો કિસ્સો છે, જેણે દરેકના દિલને ઠેસ પહોંચાડી છે.’ ‘કાશ્મીરી પંડિતો સાથે જે પણ થયું તે દુઃખદ છે. આ એક એવી ફિલ્મ છે જે દરેક ભારતીયે જોવી જોઈએ. દરેક ભારતીયે જોવું જોઈએ કે અત્યાચાર થાય ત્યારે કેવું લાગે છે.
અત્રે ઉલ્લેખનીય છે કે, અનુપમ ખેર અભિનીત ધ કાશ્મીર ફાઈલ્સ લોકોને ખુબ જ પસંદ આવી રહી છે. કાશ્મીરી પંડિતો ઉપર બનેલી આ ફિલ્મના તમામ કલાકારોના અભિનયની લોકો ખુબ જ પ્રસંશા કરી રહ્યાં છે. આ ફિલ્મે અત્યાર સુધીમાં 100 કરોડથી વધારેની કમાણી કરી છે. આ ફિલ્મને લઈને રાજકીય વિવાદ પણ શરૂ થયો છે.