લેફ્ટનન્ટ ગવર્નરે જમ્મુ & કાશ્મીરને પૂર્ણ રાજ્યનો દરજ્જો આપવાના પ્રસ્તાવને મંજૂરી આપી
કેન્દ્રશાસિત પ્રદેશને સંપૂર્ણ રાજ્યનો દરજ્જો આપવાના જમ્મુ અને કાશ્મીર કેબિનેટના પ્રસ્તાવને શનિવારે લેફ્ટનન્ટ ગવર્નરની મંજૂરી મળી ગઈ છે. ગુરુવારે મુખ્યમંત્રી ઓમર અબ્દુલ્લાની અધ્યક્ષતામાં મળેલી કેબિનેટ બેઠકમાં આ પ્રસ્તાવ પસાર કરવામાં આવ્યો હતો.
મીડિયા રિપોર્ટ્સ અનુસાર, નવી ચૂંટાયેલી જમ્મુ-કાશ્મીર વિધાનસભાનું પ્રથમ સત્ર 4 નવેમ્બર, 2024ના રોજ યોજાશે.
મુખ્યમંત્રી ઓમર અબ્દુલ્લાની અધ્યક્ષતામાં 17 ઓક્ટોબરે મળેલી કેબિનેટની બેઠકમાં જમ્મુ-કાશ્મીરને પૂર્ણ રાજ્યનો દરજ્જો આપવાનો ઠરાવ પસાર કરવામાં આવ્યો હતો. તેમાં કહેવામાં આવ્યું છે કે કેબિનેટની મંજૂરી સાથે, સંપૂર્ણ રાજ્યનો દરજ્જો પુનઃસ્થાપિત કરવાની પ્રક્રિયા શરૂ થશે, જે જમ્મુ અને કાશ્મીરના લોકોના બંધારણીય અધિકારોને પુનઃસ્થાપિત કરશે અને તેમની ઓળખની સુરક્ષા કરશે.
કેબિનેટે મુખ્ય પ્રધાનને રાજ્યનો દરજ્જો પુનઃસ્થાપિત કરવા માટે પીએમ નરેન્દ્ર મોદી અને કેન્દ્ર સરકાર સાથે મુદ્દો ઉઠાવવા માટે અધિકૃત કર્યા છે. જમ્મુ અને કાશ્મીરની આગવી ઓળખ અને લોકોના બંધારણીય અધિકારોનું રક્ષણ નવી ચૂંટાયેલી સરકારની નીતિનો આધાર છે.
સરકારના પ્રવક્તાએ કહ્યું કે સીએમ ઓમર અબ્દુલ્લા આ સંબંધમાં પીએમ મોદી અને કેન્દ્રીય મંત્રીઓને મળવા માટે આગામી દિવસોમાં નવી દિલ્હી જશે.
કેબિનેટે 4 નવેમ્બર 2024 ના રોજ શ્રીનગરમાં વિધાનસભા સત્ર બોલાવવાનું નક્કી કર્યું અને ઉપરાજ્યપાલને વિધાનસભા સત્ર બોલાવવા અને સંબોધિત કરવાની સલાહ આપી.
પ્રથમ સત્રની શરૂઆતમાં, લેફ્ટનન્ટ ગવર્નરના સંબોધનનો મુસદ્દો પણ મંત્રી પરિષદ સમક્ષ મૂકવામાં આવ્યો હતો, જેના પર મંત્રી પરિષદે નિર્ણય લીધો હતો કે તેના પર વધુ વિચારણા અને ચર્ચા કરવામાં આવશે. કાઉન્સિલે લેફ્ટનન્ટ ગવર્નરને મુબારક ગુલને પ્રોટેમ સ્પીકર તરીકે નિયુક્ત કરવાની ભલામણ પણ કરી હતી, જેઓ 21 ઓક્ટોબર, 2024ના રોજ વિધાનસભાના ચૂંટાયેલા સભ્યોને શપથ લેવડાવશે. દરમિયાન લેફ્ટનન્ટ ગવર્નરે મુબારક ગુલને વિધાનસભાના અધ્યક્ષની ચૂંટણી સુધી પ્રોટેમ સ્પીકર તરીકે નિયુક્ત કરવાનો આદેશ જારી કર્યો છે.
