દિલ્હી: તેલંગાણામાં સીએમનું નામ ફાઈનલ થઈ ગયું છે. સૂત્રોને ટાંકીને માહિતી મળી છે કે રેવંત રેડ્ડી તેલંગાણાના સીએમ હશે. નોંધનીય છે કે રેવંત રેડ્ડી તેલંગાણામાં કોંગ્રેસના અધ્યક્ષ પણ છે અને ચૂંટણી જીત્યા બાદ તેઓ હાઈકમાન્ડની પહેલી પસંદ રહ્યા હતા. જ્યારે તેલંગાણામાં કોંગ્રેસની જીત થઈ, ત્યારે ચર્ચાઓ શરૂ થઈ કે રેડ્ડીને સીએમ પદની જવાબદારી આપવામાં આવી શકે છે.
તેલંગાણામાં કોંગ્રેસની જીતમાં તેલંગાણા કોંગ્રેસના અધ્યક્ષ રેવંત રેડ્ડીએ મહત્વની ભૂમિકા ભજવી હતી. કદાચ આ જ કારણ છે કે તેઓ સીએમ પદ માટે પાર્ટીની પસંદગી બની ગયા. ઉલ્લેખનીય છે કે તેલંગાણામાં કોંગ્રેસને સ્પષ્ટ બહુમતી મળી છે. કર્ણાટક પછી તેલંગાણા દક્ષિણનું બીજું રાજ્ય છે જ્યાં કોંગ્રેસની સરકાર બનશે.
તેલંગાણામાં ચૂંટણી પ્રચાર દરમિયાન રેડ્ડીની રાહુલ અને પ્રિયંકા સાથેની નિકટતા સામે આવી હતી. જે બાદ ચૂંટણી પંડિતોએ અનુમાન લગાવવાનું શરૂ કર્યું કે જો તેલંગાણામાં કોંગ્રેસ જીતશે તો રેડ્ડી સીએમ બની શકે છે.
રેવંત રેડ્ડી તેલંગાણાના 3 સાંસદોમાંથી એક છે જેમણે 2019ની લોકસભા ચૂંટણી જીતી હતી. નવાઈની વાત એ છે કે રેવંત રેડ્ડીએ પોતાના રાજકારણની શરૂઆત એબીવીપીથી કરી હતી. આ પછી, તેઓ તેલુગુ દેશમ પાર્ટી, ટીડીપીમાં પણ રહ્યા અને બાદમાં કોંગ્રેસમાં જોડાયા અને પાર્ટીની જીતના હીરો બન્યા.
રેવંત રેડ્ડીનો જન્મ અવિભાજિત આંધ્ર પ્રદેશના મહબૂબનગરમાં વર્ષ 1969માં થયો હતો. 2009માં તેઓ ટીડીપીની ટિકિટ પર આંધ્રના કોડંગલથી ધારાસભ્ય તરીકે ચૂંટાયા હતા. તેઓ 2017માં કોંગ્રેસમાં જોડાયા હતા પરંતુ 2018ની વિધાનસભા ચૂંટણી હારી ગયા હતા. આ પછી, વર્ષ 2019 માં, તેઓ કોંગ્રેસ તરફથી લોકસભા ચૂંટણીમાં મલકજગીરીથી જીત્યા. વર્ષ 2021માં કોંગ્રેસે તેમને રાજ્યના પ્રદેશ અધ્યક્ષ બનાવ્યા.