પાકિસ્તાન ક્રિકેટ બોર્ડે ગ્લોબલ ટી20 લીગ રમવા માટે સિનિયર ખેલાડીઓને ન આપી મંજુરી
નવી દિલ્હીઃ ODI વર્લ્ડ કપ 2023 બાદ પાકિસ્તાનની પુરૂષ ક્રિકેટ ટીમ પણ T20 વર્લ્ડ કપ 2024ના ગ્રુપ સ્ટેજમાંથી બહાર થઈ ગઈ છે. ત્યારથી પાકિસ્તાન ક્રિકેટમાં બબાલ ચાલી રહી છે. પાકિસ્તાન ક્રિકેટના સંદર્ભમાં વિવિધ દાવાઓ કરવામાં આવી રહ્યા છે. એવા પણ અહેવાલ હતા કે, પીસીબી કેપ્ટન તરીકે બાબર આઝમની માનસિકતાથી નાખુશ છે. જો કે તેને સુકાનીપદેથી હટાવવામાં આવશે કે નહીં તેની પુષ્ટિ કરવામાં આવી નથી. દરમિયાન પાકિસ્તાન ક્રિકેટ ટીમના મર્યાદિત ઓવરોના કોચ ગેરી કર્સ્ટને પણ ટીમમાં એકતાના અભાવનો આરોપ લગાવ્યો હતો. આ પછી પીસીબી અધ્યક્ષ મોહસિન નકવીએ ટીમમાં ‘સર્જરી’ કરવાની વાત કરી હતી. ઉપરાંત, નવા કોચ કર્સ્ટન અને જેસન ગિલેસ્પી (ટેસ્ટ કોચ)ને ટીમમાં ફેરફાર કરવાની સંપૂર્ણ પરવાનગી આપવામાં આવી હતી. હવે પીસીબીએ વધુ એક કડક પગલું ભર્યું છે. બોર્ડે ગ્લોબલ ટી20 લીગ રમવા માટે વરિષ્ઠ ખેલાડીઓ બાબર આઝમ, શાહીન શાહ આફ્રિદી અને મોહમ્મદ રિઝવાનની નો ઓબ્જેક્શન સર્ટિફિકેટ (NOC)ની વિનંતીને ફગાવી દીધી હતી.
બોર્ડે એક નિવેદનમાં કહ્યું હતું કે, ‘પીસીબીને ગ્લોબલ ટી20 લીગમાં રમવા માટે બાબર આઝમ, મોહમ્મદ રિઝવાન અને શાહીન આફ્રિદી તરફથી એનઓસી માટે વિનંતીઓ મળી હતી. ઓગસ્ટ 2024 થી માર્ચ 2025 સુધીના પાકિસ્તાનના વ્યસ્ત ક્રિકેટ કેલેન્ડરને ધ્યાનમાં રાખીને અને ત્રણેય ખેલાડીઓ અને રાષ્ટ્રીય પસંદગી સમિતિ સાથે ચર્ચા કર્યા પછી, તેમની વિનંતીને નકારી કાઢવાનો નિર્ણય લેવામાં આવ્યો છે. આ સમયગાળા દરમિયાન પાકિસ્તાને આગામી વર્ષે ICC વર્લ્ડ ટેસ્ટ ચેમ્પિયનશિપ અને ICC ચેમ્પિયન્સ ટ્રોફીની નવ મેચ રમવાની છે. કેનેડામાં ગ્લોબલ ટી20 લીગ 25 જુલાઈથી 11 ઓગસ્ટ દરમિયાન યોજાશે.
નિવેદનમાં કહેવામાં આવ્યું છે કે, ‘આ ત્રણ ખેલાડીઓ તમામ ફોર્મેટમાં રમે છે અને પાકિસ્તાનને આગામી આઠ મહિનામાં નવ ટેસ્ટ, 14 વનડે અને નવ ટી-20માં તેમની જરૂર પડશે.’ હવે પીસીબીના આ નિર્ણયની શું અસર થશે તે તો સમય જ કહેશે. પાકિસ્તાનના ખેલાડીઓ એનઓસીની શરતોને સ્વીકારવા તૈયાર ન હતા અને તેથી જ તેઓએ ODI વર્લ્ડ કપ 2023 પહેલા PCBના સેન્ટ્રલ કોન્ટ્રાક્ટ પર હસ્તાક્ષર કરવાનો ઇનકાર કર્યો હતો. પાકિસ્તાની ખેલાડીઓ સમયાંતરે વિશ્વભરમાં T20 લીગ રમવાની મંજૂરી મેળવવા માંગતા હતા, જ્યારે PCB આ ઈચ્છતું ન હતું. જો કે, ઘણા વિવાદ પછી, બંને પક્ષો સંમત થયા હતા. હવે PCB દ્વારા NOC રદ થવાને કારણે ખેલાડીઓ પણ ગુસ્સે થઈ શકે છે.
પીસીબીએ કહ્યું હતું કે, ‘બોર્ડની વર્કલોડ મેનેજમેન્ટ પોલિસીને અનુરૂપ, પાકિસ્તાન ક્રિકેટ અને ખેલાડીઓના હિતમાં છે કે તેઓ કેનેડામાં આગામી લીગને છોડી દે જેથી તેઓ સિઝન માટે તેમની શ્રેષ્ઠ માનસિક અને શારીરિક સ્થિતિમાં હોય, જે બાંગ્લાદેશ સામેની બે મેચોની ટેસ્ટ મેચની શ્રેણીની શરૂઆત થશે. બોર્ડે પણ આ જ આધાર પર નસીમ શાહને ધ હન્ડ્રેડ માટે પરવાનગી આપવાનો ઇનકાર કર્યો હતો, પરંતુ પીસીબીએ આસિફ અલી, ઇફ્તિખાર અહેમદ, મોહમ્મદ આમિર અને મોહમ્મદ નવાઝ માટે એનઓસી મંજૂર કરી છે.
