અમદાવાદ: કોરોનાના કેસોમાં જોરદાર ઉછાળો થતાં કાલુપુર રેલવે સ્ટેશન પર માર્ચ મહિનામાં મુસાફરોની સંખ્યામાં ભારે ઘટાડો જોવા મળ્યો હતો, જે ફેબ્રુઆરી અને જાન્યુઆરીની સંખ્યાની તુલનામાં લગભગ 50 ટકા ઘટી ગયો હતો. અમદાવાદ રેલવે સ્ટેશનના અધિકારીઓએ જણાવ્યું હતું કે, છેલ્લા મિનિટમાં ટિકિટ્સ રદ કરવામાં આવી હોય તેવું ઘણીવાર બન્યું છે. જો ડિસેમ્બર અને જાન્યુઆરીમાં 10% ટિકિટ રદ કરવામાં આવી હોય તો માર્ચના મધ્યભાગથી આ આંકડો 30% થઈ ગયો અને એપ્રિલમાં તે 50% અથવા તેનાથી વધુ બુકિંગ રદ થઈ રહ્યા છે.
પશ્વિમ રેલવેના સૂત્રોએ જણાવ્યું હતું કે, મુસાફરોની સંખ્યામાં ડ્રામેટિકલી ઘટાડો થયો છે. કેટલાક રાજ્યોએ આરટી-પીસીઆર પરીક્ષણોને ફરજિયાત બનાવ્યા છે, તો બીજી તરફ કોરોનાના કેસોમાં વધારો થતાં લોકોએ બહાર ફરવા જવાના પ્લાન્સ કેન્સલ કરી દીધા છે. હાલ જે મજબૂર છે તેવા લોકો જ મુસાફરી કરી રહ્યા છે. જ્યારે કેઝ્યુઅલ મુસાફરો તેમની ટિકિટ્સ રદ કરી રહ્યા છે. પૂણેથી અમદાવાદની દુરંતો એક્સપ્રેસ માટે સોમવારે 3 ટાયર એસી સેગમેન્ટમાં 550તી વધુ ટિકિટ ઉપલબ્ધ હતી. જે પુણેથી રાત્રે 9.35 વાગ્યે રવાના થવાની હતી. સોમવારે બપોરે લગભગ 550 ટિકિટ ઉપલબ્ધ હતી, જ્યારે 2 ટાયર એસીમાં 131 બેઠકો ઉપલબ્ધ હતી. રેલવેના એક અધિકારીઓએ જણાવ્યું હતું કે, સામાન્ય રીતે રાજધાની એક્સપ્રેસનું ભાડુ ડિમાન્ડ સાથે બદલાય છે, પરંતુ સોમવારે 3-ટાયર એસીનું ભાડુ 1,475 રૂપિયા હતું. પ્રસ્થાનના એક અઠવાડિયાની અંદર ટ્રેન ભાડામાં નોંધપાત્ર વધારો થાય છે અને સામાન્ય રીતે 3-ટાયર એસી ટિકિટ માટે 2 હજાર રૂપિયા કરતા વધારે હોય છે.
ચાર લોકોનો પરિવાર કોરોનાનો RT-PCR ટેસ્ટ કરાવે તો વ્યક્તિદીઠ 800 રૂપિયા મુજબ ભાડા ઉપરાંત 3,200 રૂપિયા વધારાના ચૂકવવા પડશે. જો કોઈ વ્યક્તિ મુંબઇથી આવે છે, તો તે શતાબ્દી એક્સપ્રેસમાં ચેર કાર ટિકિટ માટે 785 રૂપિયા ચૂકવશે, જે મુસાફરીના ભાડા કરતાં વધુ છે. અધિકારીઓએ ઉમેર્યું હતું કે, ચાર દિવસ પછી પાછા ફરનારાઓએ ફરીવાર RT-PCR ટેસ્ટ કરાવવો પડશે. અમદાવાદથી મુંબઇ અને દિલ્હીની મુસાફરી માટે પણ પરિસ્થિતિ એક જેવી હતી. મંગળવારે અમદાવાદથી મુંબઇ જતા શતાબ્દી એક્સપ્રેસમાં 600 ચેર કાર સીટ્સ ઉપલબ્ધ હતી. ઉપરાંત અમદાવાદથી દિલ્હી જવા માટે રાજધાની એક્સપ્રેસમાં 250 જેટલી 2 ટાયર એસી સીટો ઉપલબ્ધ હતી. આનાથી સ્પષ્ટ છે કે, કોરોનાના કેસોમાં ઉછાળો થતાં અમદાવાદથી મુસાફરીમાં ઘટાડો થયો છે. અધિકારીએ જણાવ્યું હતું કે, 2019માં અમદાવાદ સ્ટેશન પર દૈનિક મુસાફરોની સંખ્યા એક લાખ કરતા પણ વધારે હતી.
