મુંબઈ:ભારતમાં શહેરોના નામ બદલવાની પરંપરા જૂની છે. મુઘલ કાળ દરમિયાન અનેક શહેરોના નામ બદલવામાં આવ્યા અને તે પછી અંગ્રેજો દ્વારા,પછી ઘણી સરકારો દ્વારા સ્થળોના નામ બદલવામાં આવ્યા. હવે મહારાષ્ટ્રની શિંદે સરકાર ફરીથી નામ બદલવાના સમાચારમાં છે. રાજ્યના પર્યટન મંત્રી મંગલ પ્રભાત લોઢાએ શનિવારે જણાવ્યું હતું કે,મહારાષ્ટ્ર પર્યટન વિભાગ ઔરંગાબાદ શહેર નજીકના દૌલતાબાદ કિલ્લાનું નામ બદલીને તેનું જૂનું નામ ‘દેવગિરિ’ રાખવાનો પ્રસ્તાવ મૂકશે.
દૌલતાબાદ કિલ્લાના પરિસરમાં સ્થિત ભારત માતા મંદિરમાં શનિવારે ‘હૈદરાબાદ મુક્તિ દિવસ’ની ઉજવણી માટે એક કાર્યક્રમનું આયોજન કરવામાં આવ્યું હતું, જેમાં લોઢાએ ત્રિરંગો ફરકાવ્યો હતો.લોઢાએ પત્રકારોને જણાવ્યું હતું કે, કિલ્લો દૌલતાબાદ ઉર્ફે દેવગીરી તરીકે ઓળખાય છે.તેને હજુ પણ દૌલતાબાદ કિલ્લા તરીકે ઓળખાય છે.રાજ્ય પ્રવાસન વિભાગ તેનું નામ દેવગીરી કિલ્લા તરીકે બદલવાનો પ્રસ્તાવ કરશે.તેમણે કહ્યું કે, “હૈદરાબાદ મુક્તિ સંગ્રામ દિવસના અવસર પર પ્રથમ વખત ત્રિરંગો ફરકાવવામાં આવ્યો છે અને હવે દર વર્ષે ધ્વજ ફરકાવવામાં આવશે.
ઈતિહાસકારોના મતે 14મી સદીમાં મોહમ્મદ તુઘલક દ્વારા કિલ્લાનું નામ બદલીને દૌલતાબાદ રાખવામાં આવ્યું હતું.આ કિલ્લો 1187 માં યાદવ વંશ દ્વારા બનાવવામાં આવ્યો હતો અને તે દેવગિરી તરીકે જાણીતો હતો.જ્યારે મુહમ્મદ તુઘલુકે દિલ્હીની ગાદી પર કબજો કર્યો, ત્યારે તે આ કિલ્લાથી એટલો પ્રભાવિત થયો કે તેણે પોતાનો દરબાર અને રાજધાની અહીં ખસેડવાનું નક્કી કર્યું અને તેનું નામ દૌલતાબાદ ‘સિટી ઑફ ફૉર્ચ્યુન’ રાખ્યું. તેણે દિલ્હીની સમગ્ર વસ્તીને સામૂહિક રીતે નવી રાજધાની તરફ જવાનો આદેશ આપ્યો.જો કે, પાછળથી કિલ્લો કુબ્બાતુલ ઇસ્લામ તરીકે ઓળખાયો અને આ નામથી સિક્કા બનાવવામાં આવ્યા.