ગુજરાતમાં વરસાદનું જોર ઘટતા તંત્રએ લીધો રાહતનો શ્વાસ

• આજે બપોર સુધી 36 તાલુકામાં પડ્યો સામાન્ય વરસાદ,
• કચ્છ-સૌરાષ્ટ્રમાં ભારે પવન ફુંકાવવાની શક્યતા,
• સીઝનને સૌથી વધુ વરસાદ કચ્છમાં 176 ટકાથી વધુ

અમદાવાદઃ ગુજરાતના કેટલાક વિસ્તારોમાં ભારે વરસાદ પડ્યા બાદ વરસાદનું જોર ઘટતા તંત્રએ રાહતનો શ્વાસ લીધો છે. વડાદરા, જામનગર, દેવભૂમિ દ્વારકા, પોરબંદર અને કચ્છમાં વરસાદી આફત બાદ પાણી ઉતરતા હવે નુકસાનીનો સાચો ચિતાર મળી રહ્યો છે. પૂરગ્રસ્ત વિસ્તારોમાં હવે સફાઈની ખાસ જરૂર છે. જો સાફ સફાઈ અને દવાનો છંટકાવ કરવામાં નહીં આવે તો રોગચાળો ફાટી નિકળવાની પણ દહેશત છે.

ગુજરાતમાં ગત દિવસો દરમિયાન વરસી રહેલા ધોધમાર વરસાદનું છેલ્લા બે દિવસથી જોર ઘટ્યું છે. જોકે  કચ્છ તેમજ સૌરાષ્ટ્રના મોરબી, જામનગર અને દેવભૂમિ દ્વારકામાં આજે પણ ભારે પવન સાથે વરસાદની આગાહી ભારતીય હવામાન વિભાગ દ્વારા કરવામાં આવી છે. રાજ્યમાં આજે શુક્રવારે સવારે પુરા થતાં 24 કલાક દરમિયાન કચ્છના માંડવી તાલુકામાં સૌથી વધુ 15 ઇંચ કરતા પણ વધારે વરસાદ વરસ્યો હતો. જ્યારે, સમગ્ર કચ્છ જિલ્લામાં છેલ્લા 24 કલાકમાં સરેરાશ 4 ઈંચથી વધુ તેમજ દેવભૂમિ દ્વારકા જિલ્લામાં 2 ઈંચથી વધુ વરસાદ નોંધાયો હતો. અન્ય તમામ જિલ્લામાં સરેરાશ એક ઇંચ કરતા પણ ઓછો વરસાદ વરસ્યો હતો.

આ ઉપરાંત કચ્છના નખત્રાણા અને ભચાઉ, જૂનાગઢના ભેસાણ, રાજકોટના લોધિકા, દેવભૂમિ દ્વારકાના ખંભાળિયા, જામનગરના જોડીયા, સુરેન્દ્રનગરના ચુડા અને ચોટીલા, અમદાવાદના ધોલેરા, બનાસકાંઠાના દાંતીવાડા, અરવલ્લીના ભિલોડા, નવસારીના ચીખલી, સાબરકાંઠાના પોશીના અને ડાંગના સુબિર તાલુકામાં એક ઈંચથી વધુ વરસાદ નોંધાયો હતો. આ ઉપરાંત રાજ્યના આશરે 200 તાલુકામાં એકથી ઓછો વરસાદ વરસ્યો હતો. આમ, છેલ્લા 24 કલાકમાં સમગ્ર રાજ્યના કુલ 222 તાલુકામાં સરેરાશ એક ઈંચથી ઓછો વરસાદ નોંધાયો છે.

સ્ટેટ ઈમરજન્સી ઓપરેશન સેન્ટર-ગાંધીનગરના અહેવાલ અનુસાર આજે તારીખ 30મી ઓગસ્ટ, 2024ના રોજ સવારે 6.૦૦ કલાક સુધીમાં રાજ્યમાં મોસમનો કુલ સરેરાશ વરસાદ 111 ટકા નોંધાયો છે. કચ્છ ઝોનમાં મોસમનો સૌથી વધુ 177 ટકા કરતા પણ વધારે અને ત્યારબાદ સૌરાષ્ટ્ર ઝોનમાં 124 ટકાથી વધુ તેમજ દક્ષિણ ગુજરાત ઝોનમાં 111 ટકાથી વધુ વરસાદ નોંધાયો છે. આ ઉપરાંત પૂર્વ-મધ્ય ગુજરાતમાં 105 ટકાથી વધુ, જ્યારે, ઉત્તર ગુજરાતમાં હજુ સુધી 87 ટકા જેટલો મોસમનો કુલ સરેરાશ વરસાદ નોંધાયો છે.