મુંબઇમાં એરપોર્ટ લોડરની 600 જગ્યા માટે હજ્જારો ઉમેદવારો ઉમટતા, સ્થળ પર ધક્કા મુકી અને નાસભાગ
દેશમાં બેરોજગારીની સ્થિતિ કેટલી ગંભીર છે તેની સાક્ષી પૂરતી ઘટના મુંબઇમાં બની.. અહીં એર ઇન્ડિયા દ્વારા એરપોર્ટ લોડરની 600 જગ્યાઓ માટે વોક ઇન ઇન્ટરવ્યૂ રખાયો હતો..જેમાં 25 હજારથી વધુ લોકો ઉમટ્યા હતા. જેને લીધે મુંબઈ એરપોર્ટ પર નાસભાગ જેવી સ્થિતિ સર્જાઈ હતી. 600 પોસ્ટ માટે 25,000 થી વધુ અરજદારો આવ્યા અને એર ઈન્ડિયાના કર્મચારીઓને વિશાળ ભીડને સંચાલિત કરવા માટે સંઘર્ષ કરવો પડ્યો હતો.
એરપોર્ટ લોડર્સને એરક્રાફ્ટ લોડિંગ અને અનલોડિંગ અને બેગેજ બેલ્ટ અને રેમ્પ ટ્રેક્ટર ચલાવવાનું કામ સોંપવામાં આવે છે. દરેક એરક્રાફ્ટને સામાન, કાર્ગો અને ખાદ્યપદાર્થો માટે ઓછામાં ઓછા પાંચ લોડરની જરૂર પડે છે.
પગાર કેટલો છે?
એરપોર્ટ લોડરનો પગાર દર મહિને રૂ. 20,000 થી રૂ. 25,000 ની વચ્ચે હોય છે, પરંતુ મોટાભાગના લોકો ઓવરટાઇમ ભથ્થા પછી રૂ. 30,000 કરતાં વધુ કમાય છે.નોકરી માટે શૈક્ષણિક માપદંડ તો સામાન્ય જ છે, પરંતુ ઉમેદવાર શારીરિક રીતે મજબૂત હોવો જોઈએ.
ગુજરાતમાં પણ ઈન્ટરવ્યુ માટે ભીડ ઉમટી હતી
થોડા દિવસો પહેલા ગુજરાતમાં પણ આવો જ એક કિસ્સો જોવા મળ્યો હતો. ગુજરાતના ભરૂચ જિલ્લાના અંકલેશ્વર ખાતે 40 ખાલી જગ્યાઓ માટે 800 જેટલા લોકો વોક-ઈન ઈન્ટરવ્યુ માટે આવ્યા ત્યારે નાસભાગ મચી ગઈ હતી. હોટલના પ્રવેશદ્વાર તરફ દોરી જતા રેમ્પ પર ચઢવાનો પ્રયાસ કરી રહેલા અરજદારોની લાંબી કતાર અને ધક્કામુક્કીનો વીડિયો સોશિયલ મીડિયા પર વાયરલ થયો હતો. આ દરમિયાન રેમ્પની રેલિંગ પણ તૂટી ગઈ હતી. જેના કારણે ઘણા લોકો પડી ગયા હતા, જો કે સદનસીબે કોઈને ઈજા થઈ ન હતી.
