મુંબઈ: સલમાન ખાન સ્ટારર સ્પાય થ્રિલર ફિલ્મ ‘ટાઈગર 3’ બોક્સ ઓફિસ પર સારું પ્રદર્શન કરી રહી છે. આ ફિલ્મ દિવાળીના ખાસ અવસર પર 12મી નવેમ્બરે રિલીઝ થઈ હતી અને દર્શકોને તે ખૂબ જ પસંદ આવી રહી છે. આ ફિલ્મે પહેલા દિવસે જ સારી શરૂઆત કરી હતી અને માત્ર બે દિવસમાં ઘરેલુ બોક્સ ઓફિસ પર 100 કરોડની કમાણી કરી હતી. અત્યાર સુધી સલમાન ખાનની ફિલ્મે દુનિયાભરમાં 450 કરોડ રૂપિયાની કમાણી કરી છે. જે બાદ હવે આ ફિલ્મે રણબીર કપૂરની ફિલ્મ ‘બ્રહ્માસ્ત્ર’નો રેકોર્ડ તોડી નાખ્યો છે.
જી હા, શરૂઆતના દિવસે ‘ગદર 2’નો રેકોર્ડ તોડ્યા બાદ હવે સલમાન ખાનની ફિલ્મ ‘ટાઈગર 3’એ રણબીર કપૂરની ફિલ્મ ‘બ્રહ્માસ્ત્ર’નો રેકોર્ડ તોડી નાખ્યો છે. ‘બ્રહ્માસ્ત્ર’-પાર્ટ વન’ અયાન મુખર્જીના નિર્દેશનમાં બનેલી ફિલ્મ છે જે વર્ષ 2022માં રિલીઝ થઈ હતી. આ ફિલ્મમાં રણબીર કપૂર અને આલિયા ભટ્ટ લીડ રોલમાં જોવા મળ્યા હતા. ઘરેલુ બોક્સ ઓફિસ પર ‘બ્રહ્માસ્ત્ર’નું આજીવન કલેક્શન 249.57 કરોડ રૂપિયા રહ્યું છે.
સલમાન ખાનની ફિલ્મ ‘ટાઈગર 3’ એ 16 દિવસમાં 273.8 કરોડ રૂપિયાનો બિઝનેસ કર્યો અને આ રીતે ‘ટાઈગર 3’ એ ઘરેલુ બોક્સ ઓફિસ પર ‘બ્રહ્માસ્ત્ર’ને માત આપી દીધી છે. બંને ફિલ્મોના વર્લ્ડવાઈડ કલેક્શનની વાત કરીએ તો ‘બ્રહ્માસ્ત્ર’એ દુનિયાભરમાં 431 કરોડ રૂપિયાની કમાણી કરી હતી. જ્યારે, ટાઇગર 3 એ ત્રણ અઠવાડિયા પૂરા થવા પહેલા જ બ્રહ્માસ્ત્રની કમાણીનો રેકોર્ડ તોડી નાખ્યો છે. ટાઈગર 3 એ અત્યાર સુધી વિશ્વભરમાં 450 કરોડ રૂપિયાની કમાણી કરી છે.
સલમાન ખાન અને કેટરીના કૈફ સિવાય ઈમરાન હાશ્મીએ ‘ટાઈગર 3’માં વિલનની ભૂમિકા ભજવી છે. આ સિવાય રેવતી અને રિદ્ધિ ડોગરા સહિત ઘણા કલાકારોએ ફિલ્મમાં મજબૂત ભૂમિકા ભજવી છે. ફિલ્મમાં શાહરૂખ ખાને ખાસ કેમિયો કર્યો છે. આ ફિલ્મ ટાઈગર ફ્રેન્ચાઈઝીની ત્રીજી ફિલ્મ છે, જેને દર્શકો તરફથી અપાર પ્રેમ મળી રહ્યો છે.