વલસાડઃ જિલ્લામાં રોડ અકસ્માતના બનાવો વધતા જાય છે. જેમાં વધુ એક અકસ્માતનો બનાવ ઉમરગામ નજીક સર્જાયો હતો. ઉમરગામના કનાડુ ફાટક ત્રણ રસ્તા પર પૂર ઝડપે બે બાઈક સામસામે ટક્કરાતા બે યુવકોના મોત નીપજ્યા હતા. જ્યારે બેને ઈજા થઈ હતી. પૂરઝડપે પસાર થતાં બે બાઇક વચ્ચે થયેલી જોરદાર ટક્કર સીસીટીવી કેમેરામાં કેદ થઈ ગઈ હતી.
આ અકસ્માતના બનાવની વિગતો એવી જાણવા મળી છે કે, વલસાડના ભીલાડ નજીક કનાડું ફાટક ત્રણ રસ્તા પર બે બાઇક વચ્ચે અકસ્માત સર્જાયો હતો. દમણના બામણપૂજાથી એક બાઈક કનાડુ ત્રણ રસ્તા તરફ આવી રહ્યું હતું. જ્યારે અન્ય એક બાઈક પર સવાર ત્રણ યુવકો સરીગામથી ફણસા તરફ જઈ રહ્યા હતા. તે સમયે ત્રિપલ સવારી પૂરઝડપે પસાર થઈ રહેલા બાઈક ચાલક યુવકથી ત્રણ રસ્તા પર ટર્ન નહીં કાપી શકતા ત્રણ રસ્તાથી પસાર થઈ રહેલા અન્ય એક બાઈક સાથે જોરદાર ટકરાયું હતું. ટક્કર એટલી જોરદાર હતી કે બંને બાઈક પર સવાર હવામાં ફંગોળાઈ નીચે પટકાયા હતા. જેમાં એક યુવકનું ઘટના સ્થળે મોત નિપજ્યું હતું. જ્યારે એક યુવકને સારવાર માટે વલસાડ સિવિલ હોસ્પિટલમાં ખસેડતા તેનું પણ મોત નિપજયું હતું. જ્યારે એકને ઈજાગ્રસ્ત હાલતમાં સારવાર માટે ખસેડવામાં આવ્યો હતો. અકસ્માતમાં પિયુષ પટેલ અને કાર્તિક મનોજકુમાર નામના બે યુવકોના મોત નીપજ્યા હતા. આથી સમગ્ર પંથકમાં ગમગીની છવાઈ હતી. બે બાઇકોની આ જોરદાર ટક્કરના લાઈવ દ્રશ્યો સીસીટીવી કેમેરામાં કેદ થઈ ગયા હતા.