અમદાવાદઃ વડાપ્રધાન નરેન્દ્ર મોદી શુક્રવારે ગાંધીનગરના મહેમાન બન્યાં હતા. આ દરમિયાન તેમણે ઈન્ટરનેશનલ ફાઈનાન્સિયલ સર્વિસ સેન્ટર ઓથોરિટીના હેડક્વાર્ટર બિલ્ડિંગનો શિલાન્યાસ કર્યો હતો. દેશમાં આ પ્રથમ આંતરરાષ્ટ્રીય બુલિયન એક્સચેન્જ હશે. વડાપ્રધાન મોદીએ ગિફ્ટ સિટી (ગુજરાત ઈન્ટરનેશનલ ફાઈનાન્સ ટેક-સિટી) ખાતે ઈન્ડિયા ઈન્ટરનેશનલ બુલિયન એક્સચેન્જ અને NSE IFSC-SGX કનેક્ટ પણ લોન્ચ કર્યું હતું. આ પ્લેટફોર્મ સિંગાપોર સ્ટોક એક્સચેન્જના સભ્યોને NSE IFSCમાં નિફ્ટી ડેરિવેટિવ્ઝ સાથે વેપાર કરવામાં મદદ કરશે.
આ પ્રસંગ્રે વડા પ્રધાન નરેન્દ્ર મોદીએ કહ્યું છે કે ભારત હવે યુએસએ, યુકે અને સિંગાપોર જેવા વિશ્વના દેશોની હરોળમાં ઊભું છે જ્યાંથી વૈશ્વિક નાણાંને દિશા આપવામાં આવે છે. ‘આજનો આ દિવસ ખૂબ જ મહત્વપૂર્ણ છે, ભારતની વધતી જતી આર્થિક ક્ષમતા, વધતી જતી તકનીકી ક્ષમતા અને વિશ્વનો ભારતમાં વધતો વિશ્વાસ માટે મહત્વપૂર્ણ દિવસ છે. એવા સમયે જ્યારે ભારત તેની આઝાદીનો અમૃત ઉત્સવ ઉજવી રહ્યો છે, ત્યારે આધુનિક ભારતની નવી સંસ્થાઓ અને નવી વ્યવસ્થાઓ ભારતનું ગૌરવ વધારી રહી છે.
વડાપ્રધાન મોદીએ વધુમાં કહ્યું કે આજે ગિફ્ટ સિટીમાં ઈન્ટરનેશનલ ફાયનાન્સિયલ સર્વિસ સેન્ટર્સ ઓથોરિટી – IFSCA હેડક્વાર્ટર બિલ્ડિંગનો શિલાન્યાસ કરવામાં આવ્યો છે. હું માનું છું કે આ ઈમારત તેના આર્કિટેક્ચરમાં જેટલી ભવ્ય છે તેટલી જ તે ભારતને આર્થિક મહાસત્તા બનાવવા માટે અમર્યાદિત તકો પણ ઊભી કરશે.
તેમણે કહ્યું કે ભારત હવે યુએસએ, યુકે અને સિંગાપોર જેવા વિશ્વના તે દેશોની હરોળમાં ઊભું છે જ્યાંથી વૈશ્વિક નાણાંને દિશા આપવામાં આવે છે. વડા પ્રધાન નરેન્દ્ર મોદીએ આ દરમિયાન કહ્યું હતું કે જ્યારે મેં ગિફ્ટ સિટીની કલ્પના કરી હતી ત્યારે તે માત્ર વેપાર, વ્યાપાર કે આર્થિક પ્રવૃત્તિઓ પૂરતું મર્યાદિત નહોતું. તેમણે કહ્યું, ‘દેશના સામાન્ય માણસની આકાંક્ષાઓ ગિફ્ટ સિટીના વિઝન સાથે જોડાયેલી છે. ગિફ્ટ સિટી ભારતના ભવિષ્યનું વિઝન ધરાવે છે, ભારતના સોનેરી ભૂતકાળના સપનાઓ ધરાવે છે.
પીએમએ કહ્યું કે ગિફ્ટ સિટી વાણિજ્ય અને ટેક્નોલોજીના હબ તરીકે પોતાની ઓળખ બનાવી રહ્યું છે. પીએમના જણાવ્યા અનુસાર, ગિફ્ટ સિટી સમૃદ્ધિ અને બુદ્ધિ બંને માટે પ્લેટફોર્મ પૂરું પાડે છે. મને એ જોઈને પણ આનંદ થાય છે કે GIFT સિટી દ્વારા, ભારત વૈશ્વિક સ્તરે સેવા ક્ષેત્રમાં મજબૂત હિસ્સો સાથે આગળ વધી રહ્યું છે. વડાપ્રધાને કહ્યું, ‘2008 વૈશ્વિક આર્થિક મંદીનો સમયગાળો હતો. કમનસીબે ભારતમાં પણ તે સમયે નીતિવિષયક લકવોનું વાતાવરણ હતું.
વડાપ્રધાને કહ્યું કે, આપણે એ યાદ રાખવું પડશે કે વાઇબ્રન્ટ ફિનટેક સેક્ટરનો અર્થ માત્ર વ્યવસાયિક વાતાવરણ, સુધારાઓ અને કાયદાઓ જ નથી, પરંતુ તે વિવિધ ક્ષેત્રોમાં કામ કરતા વ્યાવસાયિકોને વધુ સારું જીવન અને નવી તકો આપવાનું એક માધ્યમ પણ છે. .
આ દરમિયાન વડાપ્રધાને કહ્યું કે ગિફ્ટ સિટીની બીજી વિશેષતા એ છે કે તે ટ્રાઇસિટી અભિગમનો મુખ્ય આધારસ્તંભ છે. અમદાવાદ, ગાંધીનગર અને ગિફ્ટ સિટી એકબીજાથી માત્ર 30 મિનિટના અંતરે છે અને ત્રણેયની પોતાની આગવી ઓળખ છે. બુલિયન એક્સચેન્જના ઉદ્ઘાટન સમયે પીએમએ કહ્યું કે આજે ભારત વિશ્વની સૌથી મોટી અર્થવ્યવસ્થાઓમાંની એક છે. તેથી ભવિષ્યમાં જ્યારે આપણી અર્થવ્યવસ્થા આજની તુલનામાં મોટી હશે, ત્યારે આપણે તેના માટે અત્યારથી જ તૈયારી કરવી પડશે.
પીએમએ કહ્યું કે આ માટે આપણને એવી સંસ્થાઓની જરૂર છે, જે વૈશ્વિક અર્થવ્યવસ્થાઓમાં આપણી આજની અને ભવિષ્યની ભૂમિકાને વ્યાખ્યાયિત કરી શકે. આજે ભારતમાં રેકોર્ડ FDI આવી રહ્યું છે. આ રોકાણ દેશમાં નવી તકોનું સર્જન કરી રહ્યું છે. તે યુવાનોની આકાંક્ષાઓને પૂર્ણ કરી રહી છે, તે આપણા ઉદ્યોગોને નવી ઉર્જા આપી રહી છે અને આપણી ઉત્પાદકતામાં વધારો કરી રહી છે.
પીએમે કહ્યું કે અમે સ્થાનિક આકાંક્ષાઓને પણ મહત્વ આપીએ છીએ અને વૈશ્વિક ભાગીદારીના મહત્વને પણ સમજીએ છીએ. અમે એક તરફ કલ્યાણ માટે વૈશ્વિક મૂડી લાવી રહ્યા છીએ, બીજી તરફ વૈશ્વિક કલ્યાણ માટે સ્થાનિક ઉત્પાદનોને પ્રોત્સાહન આપી રહ્યા છીએ. આજે 21મી સદીમાં ફાઇનાન્સ અને ટેકનોલોજી એકબીજા સાથે જોડાયેલા છે. આજે રિયલ ટાઈમ ડિજિટલ પેમેન્ટના સંદર્ભમાં સમગ્ર વિશ્વમાં એકલા ભારતનો હિસ્સો 40% છે. કાર્યક્રમ દરમિયાન વડાપ્રધાને એમ પણ કહ્યું છે કે અમે શૂન્ય કાર્બન ઉત્સર્જનનું લક્ષ્ય પણ નક્કી કર્યું છે.