પશ્ચિમબંગાળ હિંસાઃ પીડિતોને પહેલા માર માર્યા બાદ રૂમમાં બંધક બનાવી સળગાવ્યાનો આક્ષેપ

નવી દિલ્હીઃ પશ્ચિમ બંગાળના બીરભૂમમાં કથિત હિંસાના મુદ્દા પર રાજ્યસભામાં હોબાળો થયો હતો. જેના કારણે ગૃહની કાર્યવાહી 16 મિનિટ સુધી સ્થગિત કરવામાં આવી હતી. ભારતીય જનતા પાર્ટી (BJP) ના રૂપા ગાંગુલીએ શૂન્ય કલાક હેઠળ મુદ્દો ઉઠાવ્યો અને ભાવુક થઈ ગયા હતા અને પશ્ચિમ બંગાળમાં રાષ્ટ્રપતિ શાસન લાદવાની માંગ કરી હતી. બંગાળ હિંસાનો મુદ્દો ઉઠાવતા ગાંગુલીએ કહ્યું કે પશ્ચિમ બંગાળ વિશે તેણી જે કહેવાનો પ્રયાસ કરી રહી છે તેની ચર્ચા કરવાથી તેણીનું માથું શરમમાં ઝૂકી જાય છે. તેમણે કહ્યું કે બીરભૂમ જિલ્લામાં બે બાળકો સહિત આઠ લોકોને જીવતા સળગાવી દેવાયા હતા. તેમણે કહ્યું કે રાજ્ય પોલીસ પર કોઈને વિશ્વાસ નથી.

ભાજપના સાંસદ રૂપા ગાંગુલીએ કહ્યું હતું કે, “ઝાલદામાં કાઉન્સિલરનું મૃત્યુ થયું હતું, સાત દિવસમાં 26 હત્યાઓ થઈ છે. આ 26 રાજકીય હત્યાઓ છે. આગમાં સળગાવીને લોકોની હત્યા કરવામાં આવી છે,” પોસ્ટમોર્ટમ રિપોર્ટમાં સામે આવ્યું છે કે પહેલા દરેકના હાથ-પગ ભાંગી નાખવામાં આવ્યા હતા અને પછી રૂમમાં બંધ કરીને સળગાવી દેવામાં આવ્યા હતા. તેમણે વધુમાં કહ્યું હતું કે, લોકો હિજરત કરી રહ્યાં છે, પશ્ચિમ બંગાળ ભારતનો અંગ છે અને બંગાળની જનતાને પણ જીવવાનો અધિકાર છે, જેથી બંગાળમાં રાષ્ટ્રપતિ શાસન લાદવું જોઈએ. પશ્ચિમ બંગાળની હિંસા મુદ્દે ચર્ચા કરતા રૂપા ગાંગુલી ભાવુક થઈ ગયા હતા.

તૃણમૂલ કોંગ્રેસના સભ્યોએ તેનો જોરદાર વિરોધ કર્યો અને હંગામો શરૂ થયો. આ દરમિયાન ભાજપ અને તૃણમૂલ કોંગ્રેસના સભ્યો વચ્ચે ઉગ્ર બોલાચાલી થઈ હતી. હંગામા વચ્ચે, ઉપાધ્યક્ષ હરિવંશે ખાસ ઉલ્લેખ હેઠળ જાહેર મહત્વ સાથે સંબંધિત મુદ્દાઓ ઉઠાવવા માટે બીજુ જનતા દળના મમતા મોહંતાનું નામ બોલાવ્યું.

અત્રે ઉલ્લેખનીય છે કે, પશ્ચિમ બંગાળમાં ટીએમસી નેતાની હત્યા બાદ હિંસા ફાટી નીકળી હતી. હિંસાની ઘટનાની તપાસ સીબીઆઈને સોંપવામાં આવી છે. બીજી તરફ સમગ્ર ઘટનાને રાજ્ય અને કેન્દ્ર સરકારે ગંભીરતાથી લીધી છે. મમતા બેનર્જીએ ગઈકાલે અસરગ્રસ્ત વિસ્તારની મુલાકાત લીધી હતી અને પીડિત પરિવારને મળ્યાં હતા.