ફાસ્ટ બોલર મયંક યાદવ હાલ કેમ 150ની ઝડપથી બોલ નથી નાખતો ? જાણો…
મયંક યાદવ IPL 2024માં લખનૌ સુપર જાયન્ટ્સ તરફથી રમતા જોવા મળ્યો હતો. તે દરમિયાન તેણે પોતાની સ્પીડથી બધાનું ધ્યાન પોતાની તરફ ખેંચ્યું હતું. 2024 IPLમાં, મયંક સતત 150 kmph કે તેથી વધુની ઝડપે બોલિંગ કરતો જોવા મળ્યો હતો. ત્યારથી મયંકને ટીમ ઈન્ડિયામાં લાવવાની માંગ ઉઠવા લાગી હતી. હવે મયંકે બાંગ્લાદેશ સામે રમાઈ રહેલી ત્રણ મેચની T20 શ્રેણીની પ્રથમ મેચમાં આંતરરાષ્ટ્રીય ક્રિકેટમાં પ્રવેશ કર્યો હતો, પરંતુ નોંધનીય બાબત એ છે કે તે 150ની ઝડપે બોલિંગ કરી શકતો નથી.
હવે વિચારવા જેવી વાત એ છે કે આઈપીએલમાં સ્પીડ બતાવનાર મયંક યાદવ ઈન્ટરનેશનલ ક્રિકેટમાં 150ની સ્પીડથી બોલિંગ કેમ નથી કરી શકતો? મયંકે 06 ઓક્ટોબરે ગ્વાલિયરમાં ભારત અને બાંગ્લાદેશ વચ્ચે રમાયેલી પ્રથમ T20 દ્વારા આંતરરાષ્ટ્રીય ક્રિકેટમાં પ્રવેશ કર્યો હતો. ત્યારબાદ તે 09 ઓક્ટોબરે દિલ્હીમાં રમાયેલી સિરીઝની બીજી મેચમાં પણ રમતા જોવા મળ્યો હતો, પરંતુ બંને મેચમાં મયંક 150ની સ્પીડ હાંસલ કરી શક્યો ન હતો. તેની સ્પીડ 150થી નીચે જોવા મળી હતી.
• મયંક યાદવની ઝડપ કેમ ઘટી?
મયંકે 2024માં જ IPLમાં ડેબ્યૂ કર્યું હતું. ડેબ્યૂ કર્યા બાદ મયંક IPLમાં માત્ર 4 મેચ જ રમી શક્યો હતો જ્યારે તે ઈજાનો શિકાર બન્યો હતો. મયંકને ઈજામાંથી પરત ફરતા ઘણો સમય લાગ્યો હતો. ઈજામાંથી પરત આવ્યા બાદ મયંકની ઝડપમાં નોંધપાત્ર ઘટાડો જોવા મળ્યો હતો. જો એમ કહેવામાં આવે કે ઈજાએ મયંકને ધીમો પાડ્યો તો કદાચ ખોટું નહીં હોય.
• આઈપીએલ 2024માં 156.7ની ઝડપે બોલ ફેંક્યો હતો
મયંકે IPL 2024માં માત્ર ચાર મેચ રમી હતી, ત્યારબાદ તે ઈજાગ્રસ્ત થયો હતો. મયંકે માત્ર ચાર મેચમાં જ ટોન સેટ કર્યો હતો. તેણે સિઝનનો સૌથી ઝડપી બોલ 156.7 કિમી પ્રતિ કલાકની ઝડપે ફેંક્યો હતો.
