રાજકોટ : ગુજરાતમાંમોંઘવારીએ માઝા મુકી છે. પેટ્રોલ-ડીઝલના ભાવ ફરીવાર વધતા જાય છે. સાથે જીવન જરૂરી ચિજ-વસ્તુઓના ભાવમાં પણ તોતિંગ વધારો થતાં ગરીબ અને મધ્યમ વર્ગની હાલત કફોડી બની છે. સરકારે તાજેતરમાં ગેસના સિલિન્ડરમાં પણ 50 રૂપિયાનો તોતિંગ વધારો ઝીંકી દેતા લોકોમાં સરકાર સામે અસંતોષ ઊભો થયો છે, ત્યારે ખાદ્યતેલના ભાવમાં પણ તોતિંગ વધારો થતાં લોકોની હાડમારી વધી ગઈ છે.
સૂત્રોના જણાવ્યા મુજબ ગુજરાતમાંવધતી જતી અસહ્ય મોંઘવારીથી પ્રજા ત્રાહીમામ પોકારી ગઈ છે. એક તરફ ગેસના બોટલના ભાવ, શાકભાજીના ભાવ, દૂધના ભાવ ભડકે બળી રહ્યા છે ત્યા હવે ખાદ્ય તેલના ભાવમાં પણ મોંઘવારી નડી છે. ખાદ્યતેલના ભાવમાં ફરી એકવાર વધારો નોંધાયો છે. સતત બીજા દિવસે સિંગતેલ અને કપાસિયા તેલના ભાવમાં વધારો ઝીંકાયો છે. આ વધારો અત્યાર સુધીનો સૌથી મોટો વધારો છે. સિંગતેલના ડબ્બામાં 30 રૂપિયાનો વધારો નોંધાયો છે. નવા ભાવ મુજબ, તેલના ભાવમાં સતત એક સપ્તાહથી વધારો થઈ રહ્યો છે. એક તરફ, પેટ્રોલ-ડીઝલ અને તેલના ભાવમાં અધધ વધારો થતાં લોકોને હાલાકીનો સામનો કરવો પડી રહ્યો છે, તો બીજી તરફ હવે જીવન જરૂરિયાતી વસ્તુઓના ભાવ પણ માઝા મૂકી રહ્યાં છે.
સૂત્રોએ ઉમેર્યું હતું કે, ગુજરાતમાં સિંગતેલના ભાવમાં આજે 30 રૂપિયા વધારો કરાયો છે. 30 રૂપિયાનો વધારો થતાં સિંગતેલનો ડબ્બાનો ભાવ 2630 રૂપિયાએ પહોંચ્યો છે. તો કપાસિયા તેલના ડબ્બાનો ભાવ 2550 થી 2580 રૂપિયા થયો છે. સરકારના અચ્છે દિનનું સુત્ર માત્ર ચૂંટણી વાયદા સાબિત થઈ રહ્યુ છે. હાલ જીવન જરૂરિયાતી તમામ વસ્તુઓની કિંમતમાં વધારો થઈ રહ્યો છે. આ મહિનાની શરૂઆતમાં યુક્રેન-રશિયાના યુદ્ધની અસરના નામે તેલના ભાવમાં વધારો કરાયો હતો. ત્યારે એક મહિનામાં તેલના ભાવમાં આ બીજીવારનો વધારો છે. છેલ્લા પચ્ચીસ દિવસમાં સીંગતેલ અને સોયાબીન તેલના ભાવોમાં તોતિંગ ભાવ વધારો થતાં ગૃહિણીઓનું બજેટ ખોરવાયું છે. સતત વધી રહેલા ખાદ્ય તેલોના ભાવોની અસર ગૃહિણીઓના બજેટ ઉપર પણ પડી છે. તેલના ડબ્બા પાછળભાવ વધારો થતા ગૃહિણીઓ પોતાના રસોડા પાછળ જે 10 હજારથી 12 હજારનો ખર્ચ કરતી હતી, તે વધીને હવે 12 થી 15 હજાર જેટલો ફાળવવો પડે છે. જેથી ખાદ્ય તેલોના વધેલા ભાવે ગૃહિણીઓને પણ મુશ્કેલીમાં મૂકી છે અને તેઓના માસિક બજેટમાં વધારો કર્યો છે. તમામ જીવન જરૂરિયાતી વસ્તુઓના ભાવ તોતિંગ વધી રહ્યા છે. દૂધ, પેટ્રોલ, શાકભાજી બાદ હવે તેલના ભાવ પણ લોકોને ટેન્શન કરાવી રહ્યાં છે.
