યશસ્વી જયસ્વાલ આ કેલેન્ડર વર્ષમાં આંતરરાષ્ટ્રીય ક્રિકેટમાં 1,000 રનનો આંકડો સ્પર્શનાર પ્રથમ ખેલાડી બન્યો
નવી દિલ્હીઃ ભારતીય બેટ્સમેન યશસ્વી જયસ્વાલ આ કેલેન્ડર વર્ષમાં આંતરરાષ્ટ્રીય ક્રિકેટમાં 1,000 રનનો આંકડો સ્પર્શનાર પ્રથમ ખેલાડી બન્યો છે. જયસ્વાલે આ સિદ્ધિ શ્રીલંકા સામે પલ્લેકેલેમાં બીજી T20 મેચ દરમિયાન હાંસલ કરી હતી. વરસાદથી પ્રભાવિત મેચમાં 8 ઓવરમાં 78 રનના ટાર્ગેટનો પીછો કરતા જયસ્વાલે 200.00ના સ્ટ્રાઈક રેટથી માત્ર 15 બોલમાં ત્રણ ચોગ્ગા અને બે છગ્ગાની મદદથી 30 રન બનાવ્યા હતા.
આ વર્ષે માત્ર 13 મેચોમાં જયસ્વાલે 63.93ની એવરેજ અને 94.54ના સ્ટ્રાઈક રેટથી 1,023 રન બનાવ્યા છે, જેમાં બે સદી અને પાંચ અર્ધસદી સામેલ છે. તેનો શ્રેષ્ઠ સ્કોર 214* છે. નોંધનીય છે કે, આ તમામ રન ટેસ્ટ અને T20I માં તેના પ્રદર્શનથી આવ્યા છે કારણ કે તેણે હજી તેની ODI ડેબ્યૂ કરવાની બાકી છે.
બીજા સ્થાને શ્રીલંકાના ખેલાડી કુસલ મેન્ડિસ (26 મેચોમાં છ અર્ધસદી સાથે 888 રન) અને ત્રીજા સ્થાને અફઘાનિસ્તાનનો ઈબ્રાહિમ ઝદરાન (25 મેચમાં એક સદી અને આઠ અર્ધસદી સાથે 844 રન) છે. આ વર્ષે છ ટેસ્ટ મેચોમાં જયસ્વાલે 11 ઇનિંગ્સ બાદ 74.00ની એવરેજથી 740 રન બનાવ્યા છે. જેમાં બે બેવડી સદી અને ત્રણ અડધી સદીનો સમાવેશ થાય છે. તેનો શ્રેષ્ઠ સ્કોર 214* છે. જ્યારે સાત T20Iમાં તેણે 47.16ની એવરેજથી 283 રન બનાવ્યા છે.
