12 ઓગસ્ટ,પટના: બિહારમાં નેશનલ ડેમોક્રેટિક એલાયન્સ (NDA) ગઠબંધન તૂટ્યા બાદ જનતા દળ યુનાઈટેડ (JDU), કોંગ્રેસ, RJDના બનેલા મહાગઠબંધનની સરકાર બની છે.નીતિશ કુમારે 8મી વખત મુખ્યમંત્રી તરીકે શપથ લીધા હતા, જ્યારે આરજેડી નેતા તેજસ્વી યાદવે નવી સરકારમાં ડેપ્યુટી સીએમ તરીકે શપથ લીધા હતા.આ સાથે હવે ડેપ્યુટી સીએમની સુરક્ષા વધારી દેવામાં આવી છે. તેજસ્વીને હવે Z પ્લસ સુરક્ષા આપવામાં આવી છે. બિહાર સરકારના ગૃહ વિભાગે તેજસ્વી યાદવની સુરક્ષા વધારવાનો નિર્ણય લીધો હતો. હવે તેજસ્વીને બુલેટ પ્રુફ વાહન પણ આપવામાં આવ્યું છે.
અત્યાર સુધી રાજ્યપાલ, મુખ્યમંત્રી નીતિશ કુમાર વગેરેને ઝેડ પ્લસ સુરક્ષા મળતી હતી.હવે આ યાદીમાં તેજસ્વી યાદવ પણ જોડાઈ ગયા છે.નાયબ મુખ્યમંત્રીની સુરક્ષાને લઈને રાજ્ય સુરક્ષા સમિતિ (SSG)ની બેઠક યોજાઈ હતી.આ બેઠકમાં તેજસ્વી યાદવને ઝેડ પ્લસ સુરક્ષા આપવાનો નિર્ણય લેવામાં આવ્યો હતો.આ સંદર્ભે રાજ્યના ગૃહ વિભાગ દ્વારા ગુરુવારે પોલીસ હેડક્વાર્ટરના નામે એક આદેશ જારી કરવામાં આવ્યો છે.
આદેશ અનુસાર, હવે તેજસ્વી યાદવ બુલેટપ્રૂફ એસયુવી દ્વારા ડ્રાઇવ કરશે. તેમની સાથે સ્પેશિયલ બ્રાન્ચના અધિકારીઓ અને બિહાર સ્પેશિયલ આર્મ્ડ પોલીસ (BSAP)ના 36 સુરક્ષાકર્મીઓ અત્યાધુનિક શસ્ત્રોથી સજ્જ હશે.તેમના કાફલામાં કુલ 7 વાહનોનો સમાવેશ કરવામાં આવશે.આમાં ત્રણ વાહનો તેજસ્વીની કારની આગળ અને ત્રણ પાછળ હશે.બીજી તરફ ડેપ્યુટી સીએમ અન્ય જિલ્લામાં જશે તો તેમના માટે સેફ હાઉસ બનાવવામાં આવશે.